ନୂଆ ଭୋଟରଙ୍କ ପାଇଁ କଡା ନିୟମ : ଅଭିଭାବକଙ୍କ SIR ବିବରଣୀ ବାଧ୍ୟତାମୂଳକ

ନୂତନ ଭୋଟର ଭାବେ ନାମ ପଞ୍ଜୀକରଣ କରିବାକୁ ଚାହୁଁଥିବା ନାଗରିକମାନଙ୍କ ପାଇଁ ଭାରତୀୟ ନିର୍ବାଚନ କମିସନ (ଇସି) ଏକ ବଡ଼ ନିୟମ ଲାଗୁ କରିଛନ୍ତି ।  ଏଣିକି ଭୋଟର ତାଲିକାରେ ନାମ ସାମିଲ କରିବାକୁ ଆବେଦନ କରୁଥିବା ନୂଆ ଆବେଦନକାରୀଙ୍କୁ ସେମାନଙ୍କ ପିତାମାତାଙ୍କର ଏସ୍ଆଇଆର୍ ବା ସ୍ୱତନ୍ତ୍ର ସଂଶୋଧନ ସ୍ଥିତିର ବିବରଣୀ ପ୍ରଦାନ କରିବାକୁ ପଡ଼ିବ ।

ଅନଲାଇନ୍ ଭୋଟର ପଞ୍ଜୀକରଣ ସମୟରେ ଏହି ଘୋଷଣାନାମାକୁ କମିସଶନ ବାଧ୍ୟତାମୂଳକ କରିଛନ୍ତି । ଏହି ନୂତନ ବ୍ୟବସ୍ଥା ଦ୍ୱାରା ନକଲି, ପ୍ରବାସୀ ଏବଂ ମୃତ ଭୋଟରଙ୍କ ନାମ ଭୋଟର ତାଲିକାରୁ ବାଦ୍ ଦେବାର ପ୍ରକ୍ରିୟା ଆହୁରି ସହଜ ହେବ ବୋଲି ନିର୍ବାଚନ କମିସନଙ୍କ ସୂତ୍ରରୁ ପ୍ରକାଶ ପାଇଛି । ଅନଲାଇନ୍ ଆବେଦନ ସମୟରେ ଏହି   ଘୋଷଣାନାମା ପୂରଣ ନକଲେ ଆବେଦନକାରୀ ଆଗକୁ ବଢ଼ିପାରିବେ ନାହିଁ ।

ଏଥିପାଇଁ ପୋର୍ଟାଲରେ ୩ଟି ବିକଳ୍ପ ଦିଆଯାଇଛି,  ପ୍ରଥମଟି ହେଉଛି ପୂର୍ବ ଏସ୍ଆଇଆର୍ ଭୋଟର ତାଲିକାରେ ଆବେଦନକାରୀଙ୍କ ନିଜ ନାମ ଥିଲା କି ନାହିଁ, ଦ୍ୱିତୀୟରେ ପିତାମାତା କିମ୍ବା ଜେଜେବାପା/ଜେଜେମାଙ୍କ ନାମ ଥିଲା କି ନାହିଁ, ଏବଂ ତୃତୀୟ ବିକଳ୍ପ ହେଉଛି ଉଭୟଙ୍କ ମଧ୍ୟରୁ କାହାରି ନାମ ପୂର୍ବ ତାଲିକାରେ ନଥିଲା । ଯଦି ଆବେଦନକାରୀ ପ୍ରଥମ ଦୁଇଟି ବିକଳ୍ପ ବାଛନ୍ତି, ତେବେ ସେମାନଙ୍କୁ ପୂର୍ବ ଏସ୍ଆଇଆର୍ ଅଧୀନରେ ଥିବା ନିର୍ବାଚନ ମଣ୍ଡଳୀ, ମତଦାନ କେନ୍ଦ୍ର ନମ୍ବର ଏବଂ କ୍ରମିକ ସଂଖ୍ୟା ପ୍ରଦାନ କରିବାକୁ ହେବ ।